ಜ್ಞಾನ ಮತ್ತು ಕ್ರಿಯೆ

ಹಳ್ಳಕ್ಕೆ ಬಿದ್ದರೆ …

ಈ ವರ್ಷ ಕೊಗ್ಗನಿಗೆ ಮದುವೆಗಳಿಗೆ ಹೋಗುವುದರಲ್ಲಿ ಬಿಡುವೇ ಇರಲಿಲ್ಲ. ಆರ್ಥಿಕ ಹಿಂಜರಿತದ ಬಿಸಿ ತಟ್ಟಿರುವುದರಿಂದ ಮನಸ್ಸಿನಲ್ಲಿ ಮದುವೆಗಳಿಗೆ ಹೋಗುವುದರ ಬಗ್ಗೆ ಹಿಂಜರಿತವಿದ್ದರೂ ಹೋಗುತ್ತಾನೆ. ಮದುವೆ ಮನೆಯ ಸಡಗರ, ಸೀರೆ ಉಟ್ಟ ನೀರೆಯರು ಮಾತ್ರವಲ್ಲದೆ ಭೋಜನ ಪ್ರಿಯನಾದುದರಿಂದ ಮದುವೆ ಬಗ್ಗೆ ಅತಿ ಆಸಕ್ತಿ. ಅದೊಂದು ಮದುವೆ ಮನೆಯಲ್ಲಿ ತನ್ನ ಗೆಳೆಯ ತನಿಯನ ಜೊತೆ ಕೊಗ್ಗ ಕುಳಿತಿದ್ದ. ಅಂದ ಹಾಗೆ ಕೊಗ್ಗನದು ಹೋದಲ್ಲೆಲ್ಲ ಅತಿ ಬುದ್ಧಿವಂತಿಕೆ.

ಹರಟುತ್ತ ಕುಳಿತಿರುವಾಗ ಮದುವೆ ಮುಹೂರ್ತ ಬಂದಿತು. ಪಕ್ಕ ಇದ್ದವರೆಲ್ಲ ಅಕ್ಷಂತರಿ ಹಿಡಿದು ವಧು ವರರ ಸುತ್ತ ಮುತ್ತ ಜಮಾಯಿಸಿದರು. ಅದನ್ನು ನೋಡಿದ ಕೊಗ್ಗ ತನಿಯನಿಗಂದ:

“ಹೇಯ್ ಈ ಅಕ್ಷಂತರಿ ಹಾಕುವುದರ ಹಿಂದಿನ ಅರ್ಥ ನಿನಗೆ ಗೊತ್ತಾ?”

“ಗೊತ್ತಿಲ್ಲ” ಬಂತು ತನಿಯನ ಉತ್ತರ.

“ತೋಳ ಹಳ್ಳಕ್ಕೆ ಬಿದ್ದರೆ ಆಳಿಗೊಂದು ಕಲ್ಲು ಅಂತ, ದಡ್ಡ ನನ್ ಮಗನೆ”, ಎಂದ ಕೊಗ್ಗ.