ನಾನು ಹಾಕಿರೋದು ಸಿಕ್ ಲೀವೆ ಸಾರ್...

ನಾನು ಹಾಕಿರೋದು ಸಿಕ್ ಲೀವೆ ಸಾರ್...

ನಮ್ಮ ಕಂಪನಿಯಲ್ಲಿ ನಡೆದ ಒಂದು ಘಟನೆ ನನಗೆ ನೆನಪಾಗುತ್ತಿದೆ. ಅದೊಂದು ದಿನ ನನ್ನ ಕೋಲೀಗ್ ಒಬ್ಬನ ಅಜ್ಜನಿಗೆ ಹುಷಾರಿಲ್ಲದ ಕಾರಣ ರಜೆ ಬೇಕಾಗಿತ್ತು. ಅದಕ್ಕವನು ನಮ್ಮ ಮ್ಯಾನೇಜರ್ ಮಾತ್ರವಲ್ಲ; ಎಲ್ಲರಲ್ಲೂ ಹೇಳಿ ರಜಾದಮೇಲೆ ಮನೆಗೆ ಹೋಗಿದ್ದ. ಹಾಗೆ ಮೂರು ದಿನ ಬಿಟ್ಟು ಬಂದು ನಮ್ಮ ಲೀವ್ ಸಿಸ್ಟಂ ನಲ್ಲಿ ಸಿಕ್ ಲೀವ್ ಹಾಕಿಬಿಟ್ಟ.
ನಮ್ಮ ಮ್ಯಾನೇಜರ್ ಗೆ ರೇಗಿ ಹೋಯಿತು.
 ಏನಪ್ಪಾ !! ಊರೆಲ್ಲ ಅಜ್ಜನಿಗೆ ಹುಷಾರಿಲ್ಲ ಅಂತ ಹೇಳಿದ್ದಿಯ. ಅದು ಹೇಗೆ ಸಿಕ್ ಲೀವ್ ಹಾಕಿದ್ದೀಯ? ಎಂದು ಗದರಿಸಿದಾಗ,
ಕೊಲೀಗ್ ಇದ್ದವನು ಬೆರಗಾಗಿ,
ಸಾರ್ ಅದರಲ್ಲಿ ಅಜ್ಜನಿಗೆ ಹುಷಾರಿರಲಿಲ್ಲ ಅಂತ ಹಾಕಿದ್ದೀನಲ್ಲ ಎಂದು ಹೇಳಿಬಿಟ್ಟ !

ಕನ್ನಡದ ಕೊಲೆ.

ಒಂದು ದಿನ ಒಂದು ಟೆಂಪೋದ ಹಿಂದೆ ಹೋಗುತ್ತಿದ್ದೆ. ಆಗ ಕಂಡ ಒಂದು ಟ್ಯಾಗ್ ಲೈನ್.
ನಿಜವಾಗಿ ಅದು ಆಗ ಬೇಕಿದ್ದದ್ದು:
"ಕನ್ನಡದ ತೇರು; ಕೈ ಮುಗಿದು ಏರು."
ಟೆಂಪೋದ ಟ್ಯಾಗ್ ಲೈನ್:
"ಕನ್ನಡದ ತೆರು; ಕೈ ಮುಗಿದು ಹೆರು."

ಹಾರುತಿಹುದು ನೋಡಾ ನಮ್ಮ ಕನ್ನಡದ ಬಾವುಟ.

ನಾನು ಹೀಗೆ ಕಂಪೆನಿಯ ಕ್ಯಾಂಟೀನ್ ನಲ್ಲಿ ಪ್ರತಿ ದಿನದಂತೆ ಆವತ್ತು ಕೂಡ ತಿನ್ನಲು ಹೊರಟಿದ್ದೆ.
ಆ ದಿನ ಮೂರನೆಯ ತಾರೀಖು, ಸೋಮವಾರ.
ಆಗ ನೋಡಿ ಕಂಡಿತು ನಮ್ಮ ಕನ್ನಡದ ಬಾವುಟ. ಖುಷಿಯಿಂದ ಮನಸ್ಸು ಪುಟ್ಟ ಮಗುವಿನಂತಾಗಿತ್ತು.
ಓಡಿ ಹೋದೆ. ಬಾವುಟದ ಪಕ್ಕ ನಿಂತು ಕಂಪೆನಿಯ ಹೆಸರು ಬರುವ ಹಾಗೆ ಕ್ಲಿಕ್ಕಿಸಿದೆ.
ಕಂಪೆನಿಯವರಿಗೆ ಕನ್ನಡದ ಮೇಲೆ ಗೌರವವಿತ್ತಾ? ಅಥವಾ ಕನ್ನಡಿಗರ ಬಗ್ಗೆ ಹೆದರಿಕೆ ಇತ್ತಾ?...
ಗೊತ್ತಾಗಲಿಲ್ಲ.